મારી લાગણીઓની સરવાણી


બધા લોકોને જીવતા રહેવું છે પણ કોઈને વૃદ્ધ નથી થવું. આપણને બુઢાપા શબ્દથી ડર લાગે છે.કમર જુકી જશે, કરચલીઓ એનું સ્થાન જમાવી લેશે, બીપી સુગર આવી ગયાં હશે, કાને સાંભળવાનું ઓછું કરી દીધું હશે, ચશ્માં અને ડુપ્લીકેટ દાંત આવી ગયા હશે, ચાલવા માટે લાકડીનો સહારો જોઈશે…ઈચ્છા હોય કે ન હોય વૃદ્ધ તો થવું જ પડશે. ડર મરી જવાનો નથી પણ બુઢાપામાં કેવી કેવી તકલીફો સહેવી પડશે એનો ભય છે.

 

એક ભજન છે..”નહોતા જોતાને ક્યાંથી આવ્યા રે આવા ઘડપણના દિવસો,..” આ ભજનમાં આશ્ચર્ય વ્યક્ત થયું છે કે પહેલાં યુવાનીના દિવસોમાં કેવું હતું અને ઘડપણ આવતાં શું થઈ ગયું. કાળા વાળ સફેદ થઈ ગયાં, કમરથી વાંકુ વળી જવાયું…વૃદ્ધ થવું એ સાહજિક છે પણ કોઈ વૃદ્ધ થવા માંગતું નથી. બધાને ફીટ અને ફાઈન રહેવું છે કાયમ. પણ એવું થતું નથી. સમય સમયનું કામ કરે છે. શરીર વૃદ્ધ થાય છે પણ મે એક વાત નોંધી છે કે મન યુવાન જ રહે છે.

 

 

જીવનનો દરેક તબક્કો વિશેષ છે. બાળપણ, જવાની, બુઢાપો…ત્રણેય તબક્કાની પોતપોતાની ખાસિયતો છે. બાળકને નથી ભવિષ્યની ચિંતાઓ કે નથી યાદ હોતો ભૂતકાળ અને એટલે જ પોતાનામાં મસ્ત રહી શકે છે. મોટાભાગના લોકો માને છે કે બાળપણ જ જીવનનો સર્વશ્રેષ્ટ સમય હતો. કિશોરાવસ્થામાં આવીએ એટલે ખબર પડવા માંડે છે અને ફરિયાદો ઉદ્ભવે છે. બીજા મિત્ર પાસે પાકું મકાન છે, મોટી વાડી છે, પોતાની કાર છે તો અમારી પાસે કેમ નહી…જીવન સાથે સમજોતો કરી લેવો પડે છે. આ સમજોતાને નશીબનું નામ અપાય છે. ક્યાં જનમ મળવો, કેવો દેખાવ મળવો, કેવો પરિવાર અને મિત્રો મળવા, આગળ ચાલતાં કેવી પત્ની અને કેવાં બાળકો મળે છે, જવાની કેવાં કામો કરીને વીતે છે, બુઢાપો કેવો હશે…બધું નશીબ છે. બાળપણ અજાણતામાં નીકળી જાય છે, જયારે જવાની આવે ત્યારે બાળપણની યાદો સતાવે છે. જયારે જવાની ચાલી જાય ત્યારે જવાની યાદ આવતી હશે કદાચ. પ્રોબ્લમ એ છે કે આપણે વર્તમાનમાં નથી જીવતા. ભૂતકાળને નથી ભૂલી શકતા અને ભવિષ્યની ચિંતાઓ છોડી નથી શકતા અને એટલે જ દુઃખી દુઃખી રહીએ છીએ. બાળક જેવું બિન્દાસ્ત થતે આવડશે તો જ મજા પડશે જીવવાની. આ તો ઠીક છે બધાનું જીવન ઓટો મોડમાં છે એટલે વિકસતું રહે છે, શ્વાસે શ્વાસે વિકાસ થતો રહે છે, સ્ત્રીના ગર્ભમાં જ્યારથી બાળક રહે છે ત્યારથી મરે છે ત્યાં સુધી વિકસતું રહે છે. જો કોઈને એવી ચાવી હાથ લાગી ગઈ જેનાથી શ્વાસ ચાલુ રહે અને શરીર વૃદ્ધ ન થાય તો….પણ કુદરતના આપવા પાછળ કોઈ કારણ તો હશે જ. જેમ બાળપણમાં એક મોજ હતી, જવાનીમાં એક અલગ મજા છે તો વૃદ્ધત્વના દિવસોનું પણ એવું જ હશે. કોઈક તો મજા છુપાયેલી હશે એ દિવસોમાં.

 

ચંદ્રકાંત બક્ષીએ એક લેખ લખ્યો હતો જેમાં ઘડપણ વિશે દુનિયાની હસ્તીઓના અવતરણો મુક્યાં છે. ચંદ્રકાંત બક્ષીને એમના મિત્ર શિશિર રામાવતે( જે ફેસબુક પર અમારાય મિત્ર છે) એક અવતરણ પુસ્તિકા આપી હતી. એ પુસ્તિકાનું નામ ગોલ્ડન યર્સ, ગોલ્ડન વર્ડ્સ ! એમાંના કેટલાક અવતરણો અહીં મુકું છું.

 

  • અમેરિકન સુપ્રીમ કોર્ટના જજ ઓલિવર વેન્ડેલ હોમ્સએ ૯૨મે વર્ષે એક ખુબસુરત સ્ત્રીને જોઈ કહ્યું: ઓહ, જો હું ૭૦ વર્ષનો હોત….!

 

  • જો મારે મારી આખી જિંદગી ફરીથી જીવવાની આવે તો હું એ જ ભૂલો ફરીથી કરું, પણ વધારે જલ્દી એ ભૂલો કરું. –એક્ટ્રેસ તાલુલાહ બેંકહેડ.

 

  • બુઢાપો બુઝ્દીલો માટે નથી. –હોલીવૂડ અભિનેત્રી બેટી ડીવીસ.

 

  • વૃદ્ધાવસ્થા એ હવાઈ જહાજ જેવી છે, જે પવનના તોફાનમાંથી પસાર થઈ રહ્યું છે. એકવાર તમે પ્લેનમાં ચડી ગયાં… પછી તમે કઈ જ કરી શકતા નથી ! –ઇઝરાયલના પૂર્વ પ્રધાનમંત્રી ગોલ્ડા માયર.

 

  • અમુક ઉમર પછી દરેક માણસ પોતાના ચહેરા માટે જવાબદાર બની જાય છે. –આલ્બેર કામ્યૂ.

 

  • લાંબુ જીવવું છે ? શ્વાસ લેતાં રહો….-સોફી ટકર

 

  • મારે માટે બુઢાપો એટલે હું જે ઉમરનો છું, એનાથી પંદર વર્ષ વધારે. –બર્નાડ બરુચ.

 

  • હું પાંસઠ વર્ષનો છું અને એટલે બુઢાપાના કૌંસમાં મુકાઈ શકું છું, પણ જો દરેક વર્ષના પંદર મહિના હોત તો આજે મારી ઉમર ફક્ત અડતાળીશ વર્ષની જ હોત.- અમેરિકન લેખક જેમ્સ થરબર.

 

  • જયારે તમારી બર્થ-ડેમાં મીણબત્તીઓની કિંમત કેકની કિંમત કરતાં વધી જાય ત્યારે સમજવું કે હવે તમે બૂઢા થઈ રહ્યા છો..! – બોબ હોપ.

 

  • તમારું શરીર તમારો સામાન છે, જેટલો સામાન વધારે, પ્રવાસ એટલો ટૂંકો. –આર્નોલ્ડ ગ્લાઝ્ગો.

 

  • જવાની એટલે પાછળ જોવાની વસ્તુ, વૃદ્ધત્વ એટલે આગળ જોવાની વસ્તુ. – ડોરોથી સેયર્સ.

 

  • વૃદ્ધત્વનો વિરોધ નહિ કરો, એ ઘણાના કિસ્મતમાં હોતું નથી ! – અજ્ઞાત.

 

  • જીવનનું મૂલ્ય દિવસોની લંબાઈથી મળતું નથી, માણસ લાંબુ જીવે અને બહુ ઓછું જીવે એવું બની શકે છે. –મોન્તેઈ

 

  • બૂઢો માણસ જિંદગીને જેટલો પ્યાર કરે છે એટલું કોઈ નથી કરતુ ! –ગ્રીક નાટ્યકાર સોફોક્લેસે.

 

  • માણસની જીંદગીમાં અચાનક, એકાએક, એક ધક્કા સાથે આવી જતી વસ્તુ છે….બુઢાપો…! -લિયો ત્રોત્સ્કી.

 

  • આટલી બધી સ્વરૂપવાન સ્ત્રીઓ….અને આટલો ઓછો સમય ! –ફિલ્મસ્ટાર જ્હોન બેરીમોર.

 

  • તમે એટલા વૃદ્ધ ક્યારેય હોતા નથી કે યુવાન ન દેખાઈ શકો. – ફિલ્મકાર માએ વેસ્ટ.

 

  • જે સ્ત્રી પોતાની ઉમર કહી દે છે એ ગમે તે કહી શકશે ! – રીતા માએ બ્રાઉન.

 

  • ચાલીસ વર્ષના વૃદ્ધ થવા કરતાં સિત્તેર વર્ષના જવાન થવામાં વધારે મજા છે. -જજ ઓલિવર વેન્ડેલ હોમ્સ

 

  • ચાલીસ એ જવાનીનો બુઢાપો છે, પચાસ એ બુઢાપાની જવાની છે…! – નવલકથાકાર વિક્ટર હ્યુગો.

 

  • જે હૃદય સૌન્દર્ય સાથે પ્રેમમાં છે એ ક્યારેય વૃદ્ધ થતું નથી…! – એક કહેવત.

 

  • જવાનો વફાદાર રહેવા માંગે છે અને હોતા નથી, બૂઢાઓ બેવફા થવા માંગે છે અને થઈ શકતા નથી. – ઓસ્કાર વાઈલ્ડ.

 

  • જો મને ખબર હોત કે હું આટલું વધારે જીવવાનો છું તો મે મારો વધારે ખયાલ રાખ્યો હોત. – અજ્ઞાત.

 

  • જયારે તમે જવાન હો છો ત્યારે તમારાં શરીરને ચેલેન્જ કરો છો. બુઢાપામાં તમારું શરીર તમને ચેલેન્જ કરે છે ! નર્તક બેરીશનીકોવ.

 

  • હું માનતો નથી કે કોઈ વૃદ્ધ થતું હોય છે, પણ જિંદગીમાં એક ઉમર એવી આવતી હોય છે કે, માણસ ઊભો રહી જાય છે અને સડવા લાગે છે. –કવિ ટી એસ એલિયટ.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: