અપડેટ્સ 29

કોરોના આવ્યો અને સાથે નવા નવા શબ્દો પણ લાવ્યો. લોકડાઉન, isolation, quarantine આ શબ્દો અને આ શબ્દોનું પાલન એકદમ નવીન અને કઠિન છે. લોકડાઉન માં મનગમતી પ્રવૃત્તિ માટે ખુબ સમય છે. અમે આજ સુધી આ સમયમાં થોડા ફિલ્મો જોયા થોડી બુકસ વાંચી અને પરિવારને સમય આપ્યો.

majili
પૂર્ણા પર મરતી શ્રાવણી..

• મજીલી ફિલ્મ પૂર્ણા(નાગા ચૈતન્ય)ની કહાની છે. એ ક્રિકેટર છે અને એના બે સપના હોય છે, ક્રિકેટ અને અંશુ. પૂર્ણાને લગ્ન શ્રાવણી (સમંથા) સાથે કરવા પડે છે. નાગા અને સમંથા બંને રિયલ લાઈફમાં પણ પતિ પત્ની છે અને આ ફિલ્મમાં પણ. બંને તૂટેલાં દિલે પરણે છે. વર્ષો પહેલાં અમે ચાર લાઈનો લખેલી એમાંની એક….

“સંધાઈ જશે એક દિવસ એવું માનીને
તૂટેલાં હૃદયો લઈ લોકો પરણતા રહ્યા”
(
મને એમ હતું કે બાકીની ચાર લાઈન સહિતની આખી રચના પોસ્ટ કરી છે અને એ પોસ્ટની લીંક આ સાથે અટેચ કરીશ પણ જયારે શોધી ત્યારે જાણ્યું કે એ હજુ પોસ્ટ કરવામાં આવી નથી. તો જલ્દીથી એ આખી રચના મુકવામાં આવશે.)

amala
ધ ડીજીટલ થીફમાં સેલ્વમ તેની પ્રિયતમા સાથે..

• Thiruttu Payable 2 આ ફિલ્મને હિન્દીમાં ધ ડિજિટલ થીફના નામે ડબ કરવામાં આવી છે. ફિલ્મનો હીરો સેલ્વમ પોલીસમાં છે અને તે મંત્રીઓના કોલ ટેપ કરી, સાંભળવાનું કામ કરે છે. તેના લવ મેરેજમાં ત્યારે ઝંઝાવાત સર્જાય છે જ્યારે સેલ્વમ તેની પત્ની અગલ્યાનો કોલ ટેપ કરે છે અને જાણે છે કે તે કોઈ યુવક સાથે રેગ્યુલર વાત કરી રહી છે. અગલ્યા ફેસબુક પર ખુબ એક્ટિવ હોય છે, કોઈ અજાણ્યાની ફ્રેન્ડ રિકવેસ્ટ સ્વીકારીને તેની સાથે ચેટિંગ કરવાથી શું પરિણામ આવી શકે તે ફિલ્મ જોઈને જાણી શકશો.

geeta
રશ્મિકા અને વિજય ગીતા ગોવિંદા ફિલ્મમાં..

• ગીતા ગોવિંદા ફિલ્મમાં નાયક વિજય દેવર્કોંડા. જ્યારથી વિજયનું ફિલ્મ અર્જુન રેડ્ડી જોયું હતું ત્યારથી આ ફિલ્મ વૈટિંગ લિસ્ટમાં હતું. પાંચ કરોડના બજેટમાં બનેલી ફિલ્મ 130 કરોડનો બિઝનેસ કરી સફળ થઈ છે. ફિલ્મ જોવાનું બીજું કારણ રશ્મિકા મંદાના છે જેનાં ફિલ્મોને અમે ફોલો કિરિક પાર્ટી ફિલ્મ જોયા પછીથી કરીએ છીએ.

Screenshot_20200421-102243_Video Player
“રશ્મિકાની બહેનને વિજય ચાહતો હતો અને રશ્મિકા દ્વારા પ્રેમપત્રો પણ મોકલાવ્યા હતા. રશ્મિકાની બહેન અને વિજયનું એક ચિત્ર હળવા અંદાઝમાં”
Screenshot_20200421-101001_Video Player
રશ્મિકા વિજયને મેચ જીતાવીને જતી વેળાએ..
Screenshot_20200421-102019_Video Player
રશ્મિકા જયારે ક્રિકેટ મેદાનમાં હોય છે ત્યારે ખરેખર ઇન્ટરનેશનલ ખેલાડી જેવી લાગે છે..

• ડીયર કોમરેડ ફિલ્મમાં વિજય દેવર્કોંડા અને રશ્મિકા મંદાનાની જોડીને ફરીવાર જોવાની મજા આવે છે. ફિલ્મમાં વિજયનો ગુસ્સા પર કાબુ નથી હોતો. રશ્મિકા સ્ટેટ લેવલ ક્રિકેટર હોય છે. આ ફિલ્મમાં રશ્મિકા ફ્રોકમાં વધુ દેખાય છે અને સુંદર પણ દેખાય છે. ડીયર કોમરેડમાં વિજય અને રશ્મિકાનો પ્રેમમાં, વિજયનો અર્જુન રેડ્ડી જેવો ગુસ્સો, રશ્મિકાનું ઈંડિયા માટે રમવાનું સપનું, વિજયનો એકાંતવાસ, અને ઘણું બધું છે.

Screenshot_20200421-103908_Video Player
ફિલ્મના હીરો અર્જુનની બોડી લેન્ગ્વેજ એસ અ બેટ્સમેન ધાકડ છે…

• “જર્સી” ફિલ્મ પણ મજીલી અને ડીયર કોમરેડની જેમ ક્રિકેટ બેકગ્રાઉન્ડ પર છે. અર્જુન જ્યારે ત્રીસ વર્ષનો, રણજીનો સર્વશ્રેષ્ઠ ક્રિકેટર હોય છે ત્યારે કારણસર ક્રિકેટ રમવાનું છોડી દે છે. ઈન્ડિયન ક્રિકેટમાં સ્થાન પામવું એ અર્જુનનું સપનું હોય છે. ચાલીસમાં વર્ષે ફરીથી અર્જુન પોતાના સ્વપ્નને સાકાર કરવા તનતોડ મહેનત કરે છે. હૈદરાબાદની ટીમ માટે પાંત્રીસ ખેલાડીઓને સિલેક્ટ કર્યા હોય છે અને તેમાંથી ટોપ 15 ના નામ જાહેર કરવાના હોય છે.

(ફિલ્મમાં જ્યારે આ સીન આવે છે ત્યારે હું મારા સ્કુલના દિવસોમાં ખોવાઈ જાઉં છું. જ્યારે હું વોલીબોલ રમતો અને ગુજરાતની ટીમ માટે ટોપ 12 ના નામ જાહેર કરવામાં આવ્યાં હતાં અને સિલેક્ટ થઈને જે સેલિબ્રેશન કર્યું હતું એવા દ્રશ્યો આ ફિલ્મમાં જોયા). ફિલ્મમાં અર્જુનનો પુત્ર પ્રત્યેના પ્રેમનું પણ સરસ નિરૂપણ કરવામાં આવ્યું છે.

Screenshot_20200421-105530_Video Player
વિજેતા ફિલ્મમાં,ચૈત્રા, રામની પડોશમાં રહે છે. વાતવાતમાં રામને ખબર પડે છે કે ચૈત્રાની મમ્મીને બુલેટ ચલાવવાનો શોખ અધૂરો રહી ગયો છે. રામ, ચૈત્રાની મમ્મીનો એ શોખ પુરો કરે છે ત્યારે એમની વ્યક્ત થતી ખુશી..

• વિજેતા તેલુગુ ફિલ્મ પિતા પુત્ર ના સંબંધ પર આધારિત છે. એક પિતા પોતાના પુત્ર અને ફેમિલી માટે પોતાનું ગમતું કરિયરનો ત્યાગ કરે છે. જ્યારે પુત્ર પિતાની અપેક્ષાઓ પર ખરો નથી ઉતરતો ત્યારે પિતા અને પુત્ર પર શું શું ગુજરે છે તે આ ફિલ્મમાં જોઈ શકશો.

• આયનો અને શૈલજા સાગર નોવેલ (અશ્વિની ભટ્ટ લિખિત) બીજી વખત વાંચી. આ ઉપરાંત સમજણ એક બીજાની (કાઝલ ઓઝા વૈદ્ય લિખિત) વાંચી.

• આ ઉપરાંત ઓશોના Es Dhammo Sanatano ઉપરના પ્રવચનો સાંભળ્યા. તેમાંથી થોડા ગમેલાં કવોટ તમારા માટે..

• मन के मालिक बनके जियो, मन के गुलाम बनकर नहीं , मांगना छोड और मालिक बन जा

• मन के विचार दर्पण के टुटे हुए टुकडे है और ध्यान पुरा दर्पण है

• होश पूर्वक निर्विचार होना ध्यान है

• जिसके चित्तमे राग और द्वेष नहीं, और जो पाप और पुण्य से मुक्त है उस जागृत पुरुष को भय नहीं

• जिन्दगी महशंख है

(એકવખત એક વ્યક્તિએ ભગવાનને પ્રસન્ન કર્યા. ભગવાન પાસે એ વ્યક્તિ એવો શંક માંગ્યો જે બધી માંગો પૂર્ણ કરી શકે. થોડા જ સમયમાં એ વ્યક્તિ ખૂબ પૈસાદાર બની ગયો. તેવામાં એક દિવસ એમના ઘરે ગુરુજી આવ્યા અને એ શંખ જોઈને બોલ્યા કે આ શંખ કરતા ડબલ અસરકારક મહાશંખ મારી પાસે છે. મહાશંખ પાસે જે માંગો એનું ડબલ આપે. આ સાંભળી પેલો માણસે ગુરુજીને કહ્યું કે મારો શંખ તમે રાખો અને મને મહાશંખ આપો. ગુરુજી સાંજે ભોજન કરી, મહાશંખ આપીને ગયા. બીજે દિવસે જ્યારે એ માણસે મહાશંખ પાસે એક લાખ રૂપિયા માંગ્યા તો મહાશંખ બોલ્યો એક લાખ શા માટે એ ને બે લાખ. મહાશંખ ફક્ત બોલ્યો કોઈ રૂપિયા ના આવ્યા. તો માણસે કહ્યું ક્યાં છે બે લાખ તો મહાશંખ બોલ્યો બે લાખ શા માટે લે ચાર લાખ, પણ કોઈ રૂપિયા આવ્યા નહીં. એ માણસ પરેશાન થઈ ગયો.

રજનીશ કહે છે કે આપણું જીવન પણ આવું જ છે. એ માણસ જેમ મહાશંખ પાસે માંગે છે તેમ આપણે પણ જિંદગી પાસે માંગીએ છીએ અને જિંદગી આપણને એ મહાશંખ ની માફક બસ દોડાવ્યા કરે છે.

20200417_102848• બેબી વેદાંશી ખિસ્સામાં હાથ નાખીને મીઠડી ભાષામાં કહે છે, પપ્પા ફોતું પાલોને…

અપડેટ્સ 28

  • આઈપીએલ પૂરી થઈ ગઈ છે અને વલ્ડ કપની તૈયારીઓ શરુ થઈ ગઈ છે. આ વર્ષે આઈપીએલમાં ધોનીસેના મારી ફેવરિટ હતી અને જે ટીમનું નેતૃત્વ કે જે ટીમમાં ધોની રમશે, ભવિષ્યમાં પણ એ ટીમ જ આપણી(મારી) ફેવરિટ રહેશે. ફાઈનલમાં છેલ્લા બોલપર હારવાનું કેવું અને કેટલું દુઃખ થાય તે અમે પણ થોડા દિવસો પહેલાં અનુભવ્યું હતું. સમાજમાં ક્રિકેટ ટુર્નામેન્ટમાં બાર ટીમોએ ભાગ લીધેલ અને દસ ઓવરની મેચ. ચાર વર્ષ પહેલાં ટુર્નામેન્ટ રમાયેલી તેમાં વિજેતા બન્યા હતા.

    56167996_2542652385805099_3705184139259936768_n
    દાંત દેખાડતું પ્રાણી એ જ અમે. ખુલાસો એટલા માટે કે પ્રોફાઈલ ફોટા જેવો માણસ શોધવા બેસશો તો બહુ વાર લાગશે. દસ- દસ ઓવરની ચાર મેચ રમતાં તો થાકી જવાયું…

 

  • ભગવાન બુદ્ધ, શ્રી શ્રી રવિશંકર, રજનીશ, ન્યુટન હજુ તો ઘણાંય હશે જેઓને ઓચિંતા જ કોઈ જ્ઞાન લાદ્યું હોય. એવું જ કઈક અમારી સાથે થયું અમને પણ જ્ઞાન મળ્યું ક્રિકેટ રમતાં.. જીવનનાં કેટલાય બોધપાઠ ક્રિકેટમાંથી મળે છે. એમાનું લેટેસ્ટ જ્ઞાન તમારી સાથે વહેંચું છું. ક્રિકેટમાં મને બેટ્સમેનનું પાત્ર ગમે. આપણે દરેક પોતપોતાના જીવનમાં બેટ્સમેન છીએ. સામે દુનિયાભરના બોલરો છે. આપણા જીવનમાં પ્રવેશેલું દરેક પાત્ર કોઈને કોઈ રીતે બોલર હોય છે. રન પણ બનાવવા છે અને આઉટ પણ નથી થવું. એમની બોલિંગને કેવી રીતે રમવી એ જો આવડી જાય તો બસ આ ફેરો સુધારી જાય.

 

  • અબાઉટ ટાઈમ ફિલ્મ વિશે થોડુંસુ ફેસબુક પર લખેલું પણ હજુ એક વાત કહેવાની રહી ગયેલી. આપણો હીરો ટીમને ભૂતકાળમાં જઈને ભૂલ સુધારી આવતાં આવડી ગયું હતું. પણ એકસમય આવે છે જયારે એના પપ્પાની શિખામણ એને યાદ આવે છે કે જીવન એવું જીવો કે કોઈ અફસોસ ના રહે, ભૂતકાળનો કોઈ વિચાર જ ના આવે..કોઈ ભૂલ ના થાય એવી રીતે જીવો. આપણે ભૂતકાળમાં જઈને કાઈ સુધારો કરી શકતા નથી એટલે ફક્ત ભૂલ થઈ ગયાનો અફસોસ રહે છે. કહેવાનો મતલબ એ નથી કે ભૂલ જ ના થાય, થાય પણ જાગ્રત રહો ધ્યાનમાં રહો, એન્જોય કરીને જીવન જીવો તો ભૂતકાળમાં જવાનો પ્રશ્ન જ નહી રહે.

 

  • ચૂંટણીના પડઘમ શાંત થઈ ગયા છે. બધા આતુરતાથી ૨૩મી મેની રાહ જોઈ રહ્યા છીએ. વર્ષ ૨૦૧૯થી બે જ આશાઓ છે. એક વલ્ડ કપ ફાઈનલમાં ૨૦૧૧ની જેમ જ ધોની સિક્સર મારીને જીતાવે અને લોકસભાની આ ચૂંટણીમાં મોદી સરકારની ફરી એકવખત બહુમતીથી રચના થાય.

 

અપડેટ્સ 27

• જીવેલા જીવનને અક્ષરોથી સંજોવવું મને ગમે છે. જીવનમાં સુંદર મધુર સારી ખરાબ અનેક ઘટનાઓ બનતી રહે છે અને બનતી રહેવાની. હા બધી પળોને બાંધીને અહી બ્લોગ રૂપી ખીલે બાંધી ન રખાય પણ કેટલીક પળો ને તો બ્લોગ પિટારામાં રાખી મુકવી ગમશે. હા તો યારો દોસ્તો સૌપ્રથમ 2019 ના નવા વર્ષની શુભકામનાઓ. 2018 નું વર્ષ સરસ રહ્યું અને મને ચશ્મા આપતું ગયું. હા, હું હવે ચશ્માધારી બની ગયો છું. ત્રણેક મહિના થયા પણ હજુ ચશ્મા પહેરવાનું ફાવતું નથી. બીજી ખબર એ છે કે શરીર પર થોડી ચરબી વધી ગઈ છે. બે મહિનાથી સવારમાં કસરત કરવાનું બંધ છે એટલે એવું લાગી રહ્યું છે કે પાંચ થી આઠ કિલો વજન વધી ગયું છે. અમે ફરીથી સવારની કસરત આજથી રાબેતા મુજબ શરૂ કરી છે એટલે વજનની ચિંતા નથી.

b2
સફેદ રણમાં આ ફોટો લેવામાં આવ્યું છે અને આઈડિયા પ્રવીણ પટેલનો છે.

 

 

 

 

• ડિસેમ્બર 2018 માં વિથોણ જવાનું થયું હતું. ઝરણાં અને સુરભિને સફેદ રણ જોવું હતું તો અમે સફેદ રણ, કાળો ડુંગર અને સ્વામિનારાયણ મંદિર ભુજની મુલાકાત લીધી હતી. વિશેષમાં સાગર, હિતેશ અને ચંદુલાલ સાથેની મુલાકાત યાદગાર રહી. અમને અફસોસ રહ્યો કે રમેશ પિંડોરિયાથી મુલાકાત થઈ શકી નહી.

 

 

 

 

 

• છેલ્લા બે ત્રણ મહિનાઓમાં બધાઈ હો, મનમરઝિયાં, અંધાધૂંધ, કારવાં, દિલ જંગલી, બાઝી, સંજુ, ફનને ખાન, હેપી ફિર ભાગ જાયેગી, સ્ત્રી, લૈલા-મજનું, સુઈ-ધાગા, પટાખા, જલેબી, તુંબાડ, બ્યુટીફુલ મનસુગળુ, કથેવોંદુ શુરુવાગીદે, ફિલ્મો જોઈ. બધાઈ હો, મનમરઝિયાં, અંધાધૂંધ, કારવાં, કથેવોંદુ શુરુવાગીદે ફિલ્મો વિશેષ ગમી. એમના પર અમને અલગથી પોસ્ટ લખવી હતી પણ અમે લખી શક્યા નથી, અફસોસ..!!

 

• ગઇકાલે ઝરણાં – સુરભિની સ્કૂલમાં વાર્ષિક રમતોત્સવ હતો. બંનેએ પોતપોતાના ક્લાસમાં ડાંસ માં ભાગ લીધો હતો.b3

 

• શ્રી અશ્વિની ભટ્ટ દ્વારા લિખિત ઓથાર બુક બીજી વખત વાંચી રહ્યો છું. જ્યારે બુક પહેલીવખત વાંચતો હતો ત્યારે એક ઇન્તેજારી અને બેચેની રહેતી કે હવે શું થશે. હમણાં જ્યારે ફરીથી ઓથાર વાંચી રહ્યો છું ત્યારે એક એક બનાવને, ઉંડાણપૂર્વકના આલેખનને છે માણી રહ્યો છું. ઓથાર બુક રીવ્યુ તમે અહી ક્લીક કરીને વાંચી શકશો.

 

• મનમરઝિયાં ફિલ્મ જાણે અમૃતા – સાહિર- ઇમરોઝ ની કહાની હોય એવો સંકેત ફિલ્મના ઇન્ટરવલ પહેલાંની અમૃતાની मैं तेनु फिर मिलांगी પરથી લાગ્યું. ફિલ્મનું એક ગીત અંજુમન તમારા માટે…

અપડેટ્સ ૨૬

  • ૨૦૧૭ નું વર્ષ ખુબ જ સારું ગયું. ઘણીબધી યાદો આપીને ગયું. સૌથી સુંદર ગીફ્ટ મળ્યું છે “વેદાંશી” ના નામે. બેબીનું નામ વેદાંશી ઝરણાં અને સુરભિએ નક્કી કરેલું.
    vedanshi
    વેદાંશી 

     

  • એક મહિનાથી સવારે વોલીબોલ રમવા જવાનું બંધ છે. એના ત્રણ કારણો છે, ઘૂંટણ માં થોડો દુખાવો છે, છેલ્લા એક મહિનાથી ઠંડી બહુ પડે છે અને રમવાની ઈચ્છાશક્તિમાં ઘટાડો થયો છે.
  • ગુજરાત ચૂંટણીની મજા લીધી. રાજકારણમાં રસ બહુ ઓછો પણ અહી(બેંગલોર)ના લોકોના સવાલોના જવાબ આપવા પણ થોડી જાણકારી રાખવી પડી. આ વખતે અમે મોદી સાહેબને સપોર્ટ જાહેર કર્યો હતો ફેસબુક પર.
  • થોડા દિવસ પહેલાં સુરભિને ગાલ પચુડીયા થયા હતા.
  • અઢાર ડિસેમ્બરે ઝરણાનો જન્મદિવસ સાદાઈથી ઉજવ્યો.
  • પાંચ બુકોનો ઓનલાઈન ઓર્ડર આપેલ છે જેનો બેસબ્રીથી ઈંતઝાર છે.
  • આજે સમાજ દ્વારા વોલીબોલ સ્પર્ધાનું આયોજન MVIT યલ્હંકા ખાતે યોજવામાં આવેલ. કર્નાટકની બધી સમાજોમાંથી લગભગ ત્રીસેક ટીમોએ ભાગ લીધેલ અને એમાંથી નેલમંગલા ટીમ વિજેતા બની. ખેલાડીઓને રમતા જોઇને, ખુરશી પર દર્શક બનીને બેસી રહેવું બહુ જ મુશ્કેલ બની રહ્યું. પણ બહુ મજા આવી ખેલાડીઓની રમત અને વોલીબોલ પ્રત્યેનો જુસ્સો જોઇને.

    vol (1)
    મેદાનનું એક દ્રશ્ય..

 

-ચંદ્રકાંત માનાણી

અપડેટ્સ 25

BeautyPlusMe_20171023112240_save
તહેવારોના દિવાળીના દિવસો દરમિયાન રાજરાજેશ્વરી નગરમાં એક સજાવેલી દુકાન.. દિવાળી એ મારા પસંદીદા લિસ્ટમાં નથી. મને દિવાળીનો તહેવાર ગમતો નથી એવું નથી પણ મને ફટાકડા નથી ગમતા. બાળપણમાં ખુબ ફટાકડા ફોડ્યા પણ ફોડવાના બંધ કરી દીધા એનેય ઘણાં વર્ષો થઈ ગયાં.
BeautyPlusMe_20171023112332_save-1
બાપુજી માટે લીધેલું દિવાળી ગિફ્ટ..
BeautyPlusMe_20171023112307_save
જીઓ સીમની ખરીદી કરવામાં આવી છે. મુકેશભાઈએ સો ટકા મની બેક આપ્યું છે. વોડાફોનની સર્વિસથી અમે ખુશ હતા છતાં એક ચેંજ માટે જીઓ સીમ ખરીદ્યું. જ્યારથી મોબાઈલ હાથમાં આવ્યો છે એક જ નંબર હતો અને હવે બે.
IMG-20170930-WA0009
હમણાં ઓશોની ચાર બુક ઓનલાઈન ખરીદી કરવામાં આવી છે. સજાગતા, કથા શાણપણની, अभी यहीं यह અને आत्मक्रांति. आत्मक्रांति વાંચી અને કથા શાણપણની વાંચી રહ્યો છું.
IMG_20170928_093026_678
ગયા મહિને નાગપુર જવાનું થયું હતું. નાગપુરથી પાછા આવતાં ટ્રેન પ્રવાસમાં વરસાદ પડી રહ્યો હતો. બારી બહારના દ્રશ્યો ખુબ સુંદર હતાં. તેમાંનું એક બેલ્લારી નજીક ઉપરોક્ત ફોટો.
Golmaal-Again2-3
ગઈકાલે ગોલમાલ-૪ જોયું. ગમ્યું..!!
volleyball-court-in-lummus-park-along-miami-beach_n1biu8_5__F0000
ગયા મહિને વોલીબોલ ગ્રુપ દ્વારા ફ્રેન્ડશિપ ટુર્નામેન્ટનું આયોજન કરવામાં આવેલ. હવેથી દર મહિને આ આયોજન થવાનું છે. ચાર ટીમો બનાવવામાં આવી હતી. એક મેચ ત્રણ સેટની અને એક સેટ પંદર પોઇન્ટનો, ટીટી પોઈન્ટ મુજબ. એક મેચ દરમિયાન અમે એક સેટ હારી ગયા હતા, બીજો સેટ જીત્યા હતા અને ફાઈનલ સેટ રમાઈ રહ્યો હતો. સામેની ટીમના ચૌદ અને અમારા નવ પોઈન્ટ હતા. સામાન્યરીતે સામેની ટીમનો જીતવા એક પોઈન્ટ જોઈતો હોય અને આપણે ત્રણ પોઈન્ટથી પાછળ હોઈએ તો પણ જીતવાના ખાસ ચાન્સ રહેતા નથી. નવમાં પોઈન્ટથી મેચ જીતવી અશક્ય જેવું હતું પણ સાહેબે મેચ જીતાવી. વર્ડકપમાં ધોનીએ જેમ સિક્ષર મારીને ફાઈનલ જીતાવી હતી એનાં જેવી એ ફીલિંગ્સ હતી.
BeautyPlusMe_20171021070632_save
દિવાળીના દિવસે સાહેબ મંદિરે ગયા હતા ત્યાં પુત્રી સુરભિએ લીધેલી તસવીર..

અપડેટ્સ-૨૪

  • કોઈ પણ આયોજન વગર ગયા મંગળવારે મેટ્રોની સફર કરી. ૨૦૧૦થી બેંગલોરમાં મેટ્રો સંચાલિત છે, પણ મેટ્રોમાં પ્રવાસ કરવાનું બન્યું નહોતું. મેટ્રોનું આયોજન, ફ્લાય ઓવર માટે ખોદાયેલા રોડ, તૈયાર થયેલા રૂટ, ઓપનીંગ સેરેમની, બધું નજર સામે જ થયું છે. જેપી નગરથી એમ જી રોડ જવું હતું. બે વાગ્યે પ્રવાસ શરુ કર્યો હતો અને અમે એમ જી રોડ અડધા કલાકમાં પહોંચી ગયા. જે પી નગરથી વાયા મેજેસ્ટીક થઈને જવું પડે. ટીકીટના સાડત્રીસ રૂપિયા થયા. જો બસમાં કે રિક્ષમાં ગયા હોત તો સહેજે સવા કલાક જેટલો સમય લાગત. ઓછા રૂપિયે, ઓછા સમયમાં એસીમાં સફરની મજા એટલે નમ્મ મેટ્રો.
    metrointerior
    મેટ્રોના કોચનું ઈંટેરીઅર ..

     

  • મેટ્રો અને મેટ્રો સ્ટેશન એકદમ સ્વચ્છ છે. ના કોઈ ચાયની કીટલી, ના કોઈ પાનનો ગલ્લો, ના સિગારેટ કે બીડીની અણગમતી વાસ કે ના કોઈ ભિખારી. જોઇને એવું લાગ્યું કે જાણે ફોરેન કન્ટ્રીમાં આવી ગયા હોઈએ. 
    metro1
    મેટ્રોમાં મંગળવારના દિવસે બપોરના સમયે પણ ખુબ ગીર્દી હતી. હમણાં ત્રણ કોચમાં મેટ્રો ચાલી રહી છે પણ નજીકના ભવિષ્યમાં જ કોચની સખ્યા વધારવી પડશે. બાજુમાં કોઈ વ્યક્તિમાંથી પસીનાની બદબુ આવતી તો ક્યારેક ક્યાંકથી ખુશ્બુની લહેરખી પણ આવી જતી. લેડીઝ માટે અલગથી વ્યવસ્થા નથી એટલે પુરુષો ગીર્દીનો ગલત ફાયદો પણ લેતા હશે. નજીકના ભવિષ્યમાં લેડીઝ માટે સ્પેશીયલ કોચ બનાવાય તો નવાઈ નહિ.

     

  • મેટ્રો બનાવવામાં લાગેલો સમય અને ખર્ચો વસુલ છે. ઘણાં લોકો મેટ્રોનો લાભ લે છે અને એ લોકો પરોક્ષરીતે પર્યાવરણને મદદરૂપ પણ થાય  છે કારણ કે જો લોકો રીક્ષા, બસ કે પ્રાઇવેટ કારમાં ટ્રાવેલ કરત તો પોલ્યુશનમાં વધારો થાત.
    metro2
    મેટ્રો સ્ટેશનની એક ઝલક..

     

     

    2017-08-05-21-34-34
    એમજી રોડ મેટ્રો સ્ટેશન પર હાથી અને મહાવતનું પુતળું…

     

  • શ્રાવણ માસ ચાલી રહ્યો છે. સ્કુલના દિવસોમાં શ્રાવણમાસના દર સોમવારે વહેલી રજા આપી દેતા પણ આજ દિ સુધી ખબર ના પડી કે શા માટે વહેલી રજા આપતા. વિથોણથી ભુજ કોલેજ જતા ત્યારે પુંઅરેશ્વરમાં બસ રોકાતી અને બધા શિવાલયમાં દર્શને જતાં. એ યાદગાર દિવસો અમસ્તા યાદ આવી ગયા. તો શ્રાવણમાસ ચાલી રહ્યો છે એટલે થયું ચાલો શિવાલયે જઈએ. ગયા રવિવારે શિવજીને ત્યાં અને આજે ગણેશ અને કાર્તિકનું મંદિર શનમુખા મંદિરે ગયાં હતાં. 
    2017-08-05-21-32-37
    ગયા રવિવારે ઓમકાર હિલમાં બિરાજમાન ભોલેનાથના મંદિરની મુલાકાત લીધી.
    2017-08-05-21-31-39
    મંદિરમાં સ્થિત એક દુકાનમાંથી ઝરણાં પોતાને ગમતું રમકડું ખરીદી રહી છે.

     

     

  •  અને હા, હેપ્પી ફ્રેન્ડશીપ ડે.

    2017-08-06-20-11-29
    આજે શનમુખા મંદિરમાં(આર આર નગર) લાક્ષણિક અદામાં..

અપડેટ્સ ૨૩

  • પહેલી નજરના પ્રેમ વિશેની માન્યતા બદલી રહી છે. વીતેલા જીવન પર નજર કરું છું તો સમજાય છે કે અમે જેને પહેલી નજરનો પ્રેમ સમજતા, એ તો એ હતાં જ નહીં. કદાચ અમે એની પહેલી નજરનો પ્રેમ હોઈએ તો કહેવાય નહીં. જીવનના આ પડાવ પર રોજે-રોજ અનેક ચહેરાઓ પહેલી નજરે ગમી જાય છે એનેય પહેલી નજરનો પ્રેમ જ કહેવો રહ્યો. આ પરથી અમે એ નિષ્કર્ષ પર આવીએ છીએ કે ઉંમરના અલગ અલગ પડાવ પર પહેલી નઝરના પ્રેમનો અર્થ બદલાતો હશે.
  • અશ્વિની ભટ્ટ કૃત કરામત નોવેલ વાંચી રહ્યો છું. હજુ શરૂઆત જ કરી છે. પન્નીફોઈ છવાયલાં છે.
  • મારો એક દોસ્ત બ્રુસ લીનો જબરો ફેન છે. એને બે-ત્રણ વખત બ્રુસ લીનો ઉલ્લેખ કરીને વખાણ્યો, તો એની જીવની વીકીપીડીયામાં વાંચી. બત્રીસ વર્ષે જ બ્રુસ લી આ દુનિયા છોડી દીધી જાણીને દુઃખ થયું. બીજો વિચાર એ આવ્યો કે અગર રોજ સવારે, આજે જીવનનો છેલ્લો દિવસ છે એવું વિચારવામાં આવે તો જીવન પ્રત્યેનો અને જીવનમાં રહેલા લોકો પ્રત્યેનો અભિગમ બદલી શકે. 
  • આજકાલ કરતાં બ્લોગને છ વર્ષ પૂર્ણ થયાં. છ વર્ષ પ્રમાણે પોસ્ટ બહુ ઓછી થઈ છે. છતાં છ વર્ષ ટકી રહ્યાનો સંતોષ છે. 
  • જ્યારથી દાઢી ઉગી છે ત્યારથી અમે ક્લીન સેવ્ડ જ રહ્યા છીએ. ગયા મહીને દાઢી વધારી હતી અને અમે ઓનલાઈન વેચાતું એક ટ્રીમર પણ પસંદ કરી લીધેલું અને પછીથી દાઢી રાખવાનું પ્લાન પોસ્ટપોંડ કરી દીધું. 
  • ઝરણાં અને સુરભિની પ્રથમ ટેસ્ટ ચાલુ છે અને તેનું છેલ્લું પેપર સોમવારે છે. આજે સાંજે ઘરની બાજુમાં બગીચો છે જ્યાં ગયાં હતાં. 

    blog
    મારી બાજુમાં ઝરણાં, પછી સુરભિ અને છેલ્લે શિલા. એક ફોટોમાં મારી આખી દુનિયા સમાઈ છે.
  • કન્નડા ફિલ્મ રાજકુમાર જોયું. સારું ફિલ્મ છે.ફિલ્મ સારો સંદેશ આપે છે.
  • વુમન ક્રિકેટ વર્લ્ડ કપની ફાઈનલ રમાઈ રહી છે. બાવીસ બોલમાં ઓગણીસ રણ જોઈએ છે અને ત્રણ વિકેટ બાકી છે, આશા છે કે ટીમ વિશ્વ વિજેતા બનીને ઈતિહાસ રચશે.
-ચંદ્રકાંત માનાણી 

અપડેટ્સ ૨૨

  • ૧. ઝરણાં અનેસુરભિનું વાર્ષિક પરીક્ષાનું પરિણામ સારું આવ્યું. ઉનાળાની રજામાં ક્યાંય ફરવા ન ગયાં. વેકેશનમાં સાઈકલ અને બેડમિંટન શીખ્યાં. ઝરણાં હવે સાઈકલ ચલાવે છે પણ સુરભિ હજુ હવે શીખશે. સુરભિ બેડમિંટનનું રેકેટ પણ બરાબર ફેરવી શકતી નથી. આજે ઘણા દિવસો પછી બેડમિન્ટન રમવા ગયા હતા.
2017-07-16-20-21-09
સુરભિએ લીધેલી તસ્વીર..

  • ૨. હુબળી ખાતે વોલીબોલની ટુર્નામેંટનું આયોજન થયું હતું. પહેલી વખત દર્શક બનીને ટુર્નામેંટને માણી. મન માનતું નહોતું અને શરીર સાથ દેતું નહોતું એટલે હવે કાયમી દર્શક બની રહેવાનું સ્વીકારી લીધું છે. હા, રોજ સવારે કલાકેક વોલીબોલ રમવાનું તો ચાલુ જ છે.

 

  • ૩. કાલે એક અજાણ્યા જ ભાઈ વોલીબોલ રમવા આવેલા. બરાબર રમતે ન્હોતું આવડતું એટલે જ્યારે બોલ બગડે એટલે કોઈ ને કોઈ એના ગુરૂ બનીને શીખવવા લાગી જાય. અને જ્યારે એ જ ગુરૂ દ્વારા ભૂલ થાય તો ચૂપ થઈ જાય અથવા કોઈ બહાનું આગળ ધરી દે. એક બોધપાઠ અહીંથી મળ્યો, કે આ દુનિયામાં આપણે બધા જ ખેલાડીઓ છીએ કોઈ અનુભવી તો કોઈ સાવ નવો. ભૂલ બધાથી થાય છે, સલાહ આપવા કરતાં મૌન રહી પોતાની રમતમાં સુધાર કરવો.
  • ૪. થોડા દિવસ પહેલા બાપુજીનું સુગર લેવેલ ખૂબ ઓછું થઈને ચોવીસ થઈ ગયું હતું. હવે બરાબર છે પણ હોસ્પિટલનો અનુભવ ખરાબ રહ્યો. સારી અને સાચી હોસ્પિટલોય હશે પણ મોટાભાગે લૂટ ચાલી રહી છે.  દર્દી કે દર્દીના ઘરનાઓ જેટલાં વધુ ડરે એટલું મોટું બિલ બને.
  • ૫. છેલ્લી અપડેટસ્ પછી ઓથાર ભાગ 1-2, પીળા રૂમાલની ગાંઠ ભાગ 1-2-3, ફીયર ઈઝ ધ કી વાંચી અને ઘણા ફિલ્મો પણ જોયા. એક બેને બાદ કરતાં બધાના રિવ્યુ નથી લખી શકાયા.
    amir
    પીળા રૂમાલની ગાંઠ નોવેલ એ મારી હરકિશન મહેતાની બીજી નોવેલ રહી. આ નોવેલમાં વર્ણનો પ્રમાણેની તસ્વીરો પણ મુકવામાં આવી છે. ઉપરની તસ્વીર પણ એમાંની એક છે જે ભાગ-૩ માંથી લીધેલી છે.

  • ૬. મે મહિનામાં ચાર દિવસ દુબઈ ફરી આવ્યો. સારો અનુભવ રહ્યો,  એક આખી પોસ્ટ લખી રાખી છે દુબઈના અનુભવો જે પછી ક્યારેક પોસ્ટ કરીશ.

 

  • ચંદ્રકાંત માનાણી

અપડેટ્સ-17

૧. કાલે સાંજે બ્લોગની મુલાકાત લીધી ત્યારે બ્લોગે જાણ કરી કે ભાઈ, છેલ્લી પોસ્ટ કરીતી એને સાત મહિના થઇ ગયા. કઈક તો લખો. વચ્ચે વચ્ચે બે-ત્રણ વખત લખ્યું એ ફેસબુક પર પોસ્ટ કરી દીધું. અઠવાડિયે એક પોસ્ટ લખવાનું નક્કી તો કર્યું હતું , પણ જવા દો એ વાત. જીવનમાં ઘણું બધું બની ગયું સાત મહિનામાં. ગયા વર્ષે ડીસેમ્બરમાં વિથોણ ગયો હતો અને ખુબ મજા કરી હતી. સફેદ રણની મુલાકાત લીધી. સાગર.સીકે અને હિતેશને મળ્યો. ગુલાબી ઠંડી, વહેલી સવારનું તારાઓથી ભરેલું આકાશ, પરિચિત તડકો, ચણીયા બોર અને અડદિયા યાદ આવી રહ્યા છે.

 

૨. છેલ્લા સાત મહિનામાં કોઈ કવિતા નથી લખી. એક સ્ટોરી લખી છે જેના પર થોડું હજુ લખવાનું બાકી છે એટલે પોસ્ટ કરી શક્યો નથી. કોઈ બૂક નથી વાંચી પણ ખુબ બધા ફિલ્મો જોયાં. બેફિક્રે, તુમબીન-૨, ડીયર જીન્દગી, વજહ તુમ હો, અય દિલ હે મુશ્કિલ, અકીરા, પિંક, કાબિલ, લાલરંગ, રુસ્તમ, parched, જુનુંનિયત, સુલતાન, દંગલ, તીન, સાલા ખડૂસ, ફેન, કપૂર એન્ડ સન્સ, દિલવાલે, ફિતૂર, વઝીર, શાનદાર, તલવાર, મસાણ, હેપ્પી ભાગ જાયેગી, ફુકરેય, NH10, એમ એસ ધોની, કાલ કેજી પ્રીતિ(કન્નડા)(પા કિલો પ્રેમ), ચોઉક(કન્નડા)…

 

૩. ફેસબુક થોડા દિવસથી બહુ પરેશાન કરતું હતું, તો એક મહિના માટે ડીએક્ટીવેટ કર્યું હતું. કોઈને કશો ફેર પડ્યો નહોતો અને કોઈએ મને એફ્બી પર નથી દેખાતા એવું કહ્યું નહોતું. કોઈને કશો ફેર ન પડ્યો અને મારામાં પણ કોઈ શાણપણ ન આવ્યું એફ્બી બંધ રાખીને. છતાં ભવિષ્યમાં પણ એવા નિર્ણય લેવાશે.

 

૪. એક નાનોસો બનાવ બનેલો થોડા દિવસ પહેલા..અમે બે મિત્રો વાત કરી રહ્યા હતા. એવામાં એક ભાઈ આવ્યા જે મારી સાથે વાત કરતા હતા એના ખાસ મિત્ર. એ ભાઈએ એના મિત્રને મારી ઓળખાણ કરાવી અને મેં રામરામ કરવા હાથ લંબાવ્યો તો એ ભાઈ કહે સોરી હું હમણાં જમવા જઈ રહ્યો છું એમ કહીને રામરામ ન કર્યા બોલો…! એકપળ માટે મારી સ્થિતિ અપમાનજનક થઇ ગઈ. બીજી જ ક્ષણે અપમાનિત થયાનો ભાવ મનમાંથી ચાલ્યો ગયો. મને જરાય ખરાબ નહોતું લાગ્યું. બસ મને એવું જ થવું છે, કોઈ પણ સ્થિતિમાં સહજ, સ્થિર, સ્વસ્થ..ના દુ:ખી ના સુખી, ના માન ના અપમાન, બિલકુલ મધ્યમાં..

 

૫. ઝરણાં અને સુરભિની વાર્ષિક પરીક્ષા પૂર્ણ થઇ ગઈ છે અને હમણાં એ વેકેશનની મજા લઇ રહી છે. આઠ એપ્રિલના રીઝલ્ટ મળવાનું છે.

 

૬. દંગલ, સુલતાન અને સાલા ખડૂસ ફિલ્મ સ્પોર્ટ્સને લગતી છે. ત્રણેય ફિલ્મ ખૂબ ગમી. કઈ ફિલ્મ સૌથી વધુ ગમે છે કહી શકાતું નથી. મેં ત્રણેય ફિલ્મમાં એક વાત કોમન નોટ કરી. સપનાઓનો ભંગાર…દંગલમાં એક બાપનું સપનું, સુલતાનમાં એક કોચ(રણદીપ હુડાનું સપનું) અને સાલા ખડૂસમાં પણ કોચ(રાઘવન)નું સપનું. સુલતાનના ગીતો સારાં છે.

 

૭. એમ એસ ધોની બાયોપિક છે. ફિલ્મમાં એક ગીત છે જે મને ખુબ ગમે છે.

તું આતા હે સીનેમેં જબ જબ સાંનસે લેતી હું

તેરે દિલકી ગલીયો સે મેં હરરોઝ ગુઝરતી હું

હવાકે જૈસે ચલતા હે તું

મેં રેત જૈસે ઉડતી હું

કૌન તુજે યું પ્યાર કરેગા જૈસે

જૈસે મેં કરતી હું…

 

કેટલાક ગીતો એવા હોય છે જેને સાંભળતા એવું લાગે જાણે આ મારી જ લાગણીઓ છે, આ ગીત મેં જ લખ્યું છે અને એ ગીત આપણા જીવનમાં ભળી જાય છે. આવા જ બીજા બે ગીત જે મારા પસંદીદા છે, એક તો સુન સાયબા સુન અને બીજું સાત સમુંદર પાર મેં તેરે પીછે પીછે આ ગઈ..

 

૮. સવારની મોર્નિંગ વોલ્ક હવે વોલીબોલ ગેમમાં તબદીલ થઇ ગઈ છે. છ-સાત મહિનાથી નિયમિત વોલીબોલની મજા મળી રહી છે.ગઈકાલે યુગાદી તહેવારની રજા હતી. હું સાંજે તળાવ કિનારે વોલ્કીંગ કરવા ગયો હતો. ત્યાં સવારમાં સાથે રમીએ છીએ તે દોસ્તો પણ મળ્યા. આટલા દિવસોમાં ન મેં એમને પૂછ્યું હતું કે ના તો એમને મને પૂછ્યું હતું કે તમે શું કરો છો ક્યાં રહો છો, પણ કાલે બરાબર ઓળખાણ થઈ અને પછી અમે જ્યુસ પીવા ગયા હતા.

 

૯. હમણાં અશ્વિની ભટ્ટ દાદાની “ઓથાર” નોવેલ વાંચી રહ્યો છું. આજ સુધી પહેલા ભાગના ૧૨૦ પેજ વાંચ્યા છે.

 

  • ચંદ્રકાંત માનાણી

અપડેટ્સ-16

૧. ઝરણાં અને સુરભિની મિડ ટર્મ એક્ઝામ ચાલી રહી છે. બે ત્રણ દિવસ પછી દશેરા વેકેશન પડવાનું છે અને વેકેશનમાં શું શું કરશું એની ચર્ચાઓ પણ ચાલુ છે. મોબાઈલમાં સબ વે સર્ફ એક જ ગમતી ગેમ છે તો સૌ પ્રથમ ટેમ્પલ રન અપાવવાની તીવ્ર માંગ છે.

૨. નવરાત્રી નજીક આવી રહી છે. મજ્જા આવશે.

૩. એક સેકેન્ડ હેન્ડ કાર લીધી. કારની શોધ ક્વિકર દોટ કોમ પરથી થઈ.

૪. એક નવો ક્રમ ચાલુ કર્યો છે…રોજ રાત્રે સુવાથી પહેલા ઝરણાં અને સુરભિને નાની બોધ કથા કહેવાનો. જોઈએ કેટલા દિવસ આ ક્રમ ચાલે છે. વાર્તા સંભળાવી બાળકોને પ્રિય હોય છે હું અમસ્તું કહી દઉં આજે વાર્તા કહીશ તો સુવા સમયે અચૂક યાદ અપાવે…પપ્પા વાર્તા કરો…

૫. અંગાર બૂક વાંચ્યા પછી હવે ગીતા વાંચવાનું શરુ કર્યું છે.